തോട്ടില്‍ കക്കൂസ് മാലിന്യം തള്ളി: കുര്യനാട്ട് 60-ലേറെ കുടുംബങ്ങളില്‍ കുടിവെള്ളം മുട്ടി

കുര്യനാട്: കുര്യനാട് തോട്ടില്‍ കക്കൂസ് മാലിന്യം ഒഴുക്കിയത് 60-ലേറെ കുടുംബങ്ങളുടെ കുടിവെള്ളം മുട്ടിച്ചു. കുര്യനാട് -ഉഴവൂര്‍ റോഡരുകിലെതോട്ടിലേക്കാണ് ശനിയാഴ്ച രാത്രി കക്കൂസ് മാലിന്യം നിക്ഷേപിച്ചത്.
അരിക്കൂഴി കുടിവെള്ള പദ്ധതിയുടെ കിണര്‍ ഈ തോടിന്റെ അരുകിലാണ്. ഈ കിണറിന് സമീപത്താണ് കക്കൂസ് മാലിന്യം നിക്ഷേപിച്ചത്. അറുപതിലേറെ കുടുംബങ്ങളുടെ കുടിവെള്ള സ്രോതസാണ് ഇതോടെ മലിനമാക്കപ്പെട്ടത്. എത്രയും വേഗം കുറ്റവാളികളെ കണ്ടെത്തണമെന്ന് വാര്‍ഡ് മെമ്പര്‍ സാബു അഗസ്റ്റ്യന്‍ ആവശ്യപ്പെട്ടു.
ഈ മേഖലയില്‍ തോട്ടിലേക്ക് അടക്കം പൊതു സ്ഥലങ്ങളില്‍ കക്കൂസ് മാലിന്യം നിക്ഷേപിക്കുന്നത് പതിവാണ്. വെമ്പള്ളി സ്‌ക്കൂളിന് സമീപത്ത് കക്കൂസ് മാലിന്യം നിക്ഷേപിച്ചത് അടുത്ത കാലത്താണ്. ഇവിടേക്ക് കക്കൂസ് മാലിന്യവുമായി പോന്ന വാഹനത്തെ കുറിച്ച് കാണക്കാരി റെയില്‍വേ ഗേറ്റിലെ വാച്ച്മാന്‍ കൃത്യമായ വിവിരം പോലീസിന് നല്‍കിയിരുന്നു. കുര്യനാട് ഉഴവൂര്‍ റോഡില്‍ കുര്യനാട് തോട്ടിലേക്ക് പാറക്കുടി കവലയ്ക്ക് സമീപം മാസങ്ങള്‍ക്ക് മുമ്പ് പലതവണ കക്കൂസ് മാലിന്യം നിക്ഷേപിക്കപ്പെട്ടിരുന്നു. ജില്ലാ കൃഷിത്തോട്ടത്തിലെ കോഴാ പാടശേഖരത്ത് കക്കൂസ് മാലിന്യം നിക്ഷേപിക്കപ്പെട്ടത് ഒരുവര്‍ഷം കൃഷി നശിക്കാന്‍ തന്നെ ഇടയാക്കിയിരുന്നു.