കുറവിലങ്ങാട്:
വേനല്‍ മഴയുടെ ആരംഭമായതോടെ കെഎസ്ഇബി മരങ്ങാട്ടുപിള്ളി, കുറവിലങ്ങാട് സെക്ഷന്‍
ഓഫീസുകളുടെ പരിധിയിലുള്ള ഒട്ടുമിക്ക സ്ഥലങ്ങളിലും വൈദ്യുതിയില്ല.
സാമ്പത്തികവര്‍ഷാവസാനമായതോടെ സര്‍ക്കാര്‍ ഓഫീസുകളും ബാങ്കുകളും ഇടപാടുകാരെക്കൊണ്ട്
തിരക്കിലാണ്. ക്രൈസ്തവ സമൂഹം വിശുദ്ധ വാരവും ആചരിക്കുന്ന സമയം.
അടുത്ത രണ്ടു പ്രവൃത്തി ദിനങ്ങള്‍ അവധി ദിവസങ്ങളായതിനാല്‍ നൂറുകണക്കിനാളുകളാണ് വിവിധ ആവശ്യങ്ങള്‍ക്കായി എത്തുന്നത്. എന്നാല്‍, വൈദ്യുതിയില്ലാത്തതിനാല്‍ ഒന്നും ചെയ്യാന്‍ കഴിയുന്നില്ല. വിവിധ സര്‍ട്ടിഫിക്കറ്റുകള്‍ക്കായി അക്ഷയ കേന്ദ്രങ്ങള്‍ വഴി അപേക്ഷ നല്‍കിയവരും കഷ്ടപ്പെടുകയാണ്.
വൈദ്യുതി വന്നാലുടനെ ജീവനക്കാര്‍ കംപ്യൂട്ടറിനരികിലേക്ക് ഓടും. കംപ്യൂട്ടര്‍ പ്രവര്‍ത്തനക്ഷമമായി വരുമ്പോഴേക്കും വൈദ്യുതി നിലയ്ക്കും. ബാങ്കുകളിലും വിവിധ ഓഫീസുകളിലുമെല്ലാം കഴിഞ്ഞ മൂന്നു ദിവസമായി ജോലികളെല്ലാം വൈദ്യുതിയില്ലാത്തതിനാല്‍ തടസപ്പെട്ടിരിക്കുകയാണ്. ദിവസവും ഉച്ചകഴിഞ്ഞുണ്ടാകുന്ന വേനല്‍മഴയാണ് വില്ലനെന്ന് കെഎസ്ഇബി അധികൃതര്‍ പറയുന്നത്്. വേനല്‍മഴയ്‌ക്കൊപ്പമുണ്ടായ ശക്തമായ കാറ്റില്‍ മരങ്ങള്‍ വീണ് പലയിടങ്ങളിലും വൈദ്യുതി ലൈനുകള്‍ തകരാറിലാണ്. അറ്റകുറ്റപ്പണികള്‍ക്കായി മണിക്കൂറുകളോളം ലൈന്‍ ഓഫാക്കേണ്ടി വരുന്നെന്ന് അധികൃതര്‍ പറയുന്നു.
എന്നാല്‍, കരാര്‍ തൊഴിലാളികളെ ഉപയോഗിച്ചാണ് ലൈനിലെ അറ്റകുറ്റപ്പണികള്‍ നടത്തുന്നതെന്ന് നാട്ടുകാര്‍ പറയുന്നു. ജോലിയില്‍ മതിയായ സുരക്ഷ ഇല്ലാത്തതിനാല്‍ കരാര്‍ തൊഴിലാളികള്‍ കുറഞ്ഞുവരുന്നതുമൂലമാണ് വൈദ്യുതി വിതരണം സുഗമമാക്കാന്‍ കഴിയാത്തത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ