കുറവിലങ്ങാട്: നാമഹേതുകനുമുമ്പില് കൃതജ്ഞതാ
മലരുകളുമായി 256 പേര് ഒത്തുചേര്ന്നു. പേരിലുള്ള ഐക്യരൂപ്യവുമായി
കോഴാ സെന്റ് ജോസഫ്സ് കപ്പേളയിലായിരുന്നു വേറിട്ട സംഗമം.
കപ്പേളയില് നടന്നുവന്ന വണക്കമാസാചരണത്തിന്റെ ഭാഗമായിരുന്നു
ജോസഫ് നാമധാരികളുടെ സംഗമം. സംഗമത്തിനെത്തിയവര്ക്ക് ആത്മീയ
പിന്തുണയുമായി മര്ത്ത്മറിയം ഫൊറോന വികാരി ഫാ. അബ്രാഹം
കൊല്ലിത്താനത്തുമലയിലിന്റെ നേതൃത്വത്തില് ഇടവകയില് സേവനം
ചെയ്യുന്ന വൈദികരും എത്തിയതോടെ വിശ്വാസികള് ഏറെ
സന്തോഷത്തിലായിരുന്നു.
നീതിയുടെ വിളനിലമായ മാര് യൗസേപ്പിനെ മാതൃകയാക്കണമെന്ന് സംഗമത്തില് സന്ദേശം നല്കിയ സിഎംഐ പ്രിയോര് ജനറാള് ഫാ. ജോസ് പന്തപ്ലാംതൊട്ടിയില് പറഞ്ഞു. ദൈവികമായ കാഴ്ചപ്പാടോടെയാവണം സമൂഹമെന്നും ഫാ. പന്തപ്ലാംതൊട്ടിയില് ഓര്മ്മിപ്പിച്ചു.
ഫൊറോന വികാരി ഫാ. അബ്രാഹം കൊല്ലിത്താനത്തുമലയില്, ഫാ. ഇമ്മാനുവല് പാറേക്കാട്ട്, ഫാ. ജോസഫ് മേയിക്കല്, ഫാ. ജോസഫ് ആട്ടപ്പാട്ട് എന്നിവര് തിരുകര്മ്മങ്ങളില് കാര്മികത്വം വഹിച്ചു.
വണക്കമാസാചരണത്തിന്റെ ഭാഗമായി ഭക്തിനിര്ഭരമായ പ്രദക്ഷിണവും നടന്നു. ഫാ.ജോസഫ് അരിമറ്റത്തിന്റെ കാര്മികത്വത്തിലായിരുന്നു വണക്കമാസാചരണ തിരുകര്മ്മങ്ങള്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ