കുറവിലങ്ങാട്:
കടപ്ലാമറ്റം, മരങ്ങാട്ടുപിള്ളി, ഗ്രാമ പഞ്ചായത്തുകള്‍ നടപ്പു സാമ്പത്തിക വര്‍ഷം
നൂറ് ശതമാനം പദ്ധതി വിഹിതവും ചെലവഴിച്ചു. കടപ്ലാമറ്റം പഞ്ചായത്ത് സാമ്പത്തിക
വര്‍ഷം അവസാനിക്കാന്‍ ഒരു ദിനം കൂടി ബാക്കി നിര്‍ത്തിയാണ് പദ്ധതി
പൂര്‍ത്തിയാക്കിയത്. വെളിയന്നൂര്‍, കുറവിലങ്ങാട്, ഉഴവൂര്‍
പഞ്ചായത്തുകളുടെ വിനയോഗം 80 ശതമാനവും കടന്നു.
85 പദ്ധതികളിലൂടെയായി 89.41 ലക്ഷം രൂപയാണ് കടപ്ലാമറ്റത്ത് ചെലവഴിച്ചത്. ജനറല്‍ വിഭാഗത്തില്‍ 63 ലക്ഷം രൂപയുടെയും പട്ടികജാതി വിഭാഗത്തില്‍ 22.62 ലക്ഷം രൂപയുടെയും പട്ടിക വര്‍ഗ്ഗ വിഭാഗത്തില്‍ 3.79 ലക്ഷം രൂപയുടെയും പദ്ധതികള്‍ പൂര്‍ത്തിയാക്കി. ലോകബാങ്ക് ഗ്രാന്റ് 11.77 ലക്ഷം രൂപയും വിനയോഗിച്ചതായി പ്രസിഡണ്ട് കെ.എ. ചന്ദ്രന്‍, വികസന കാര്യ സ്ഥിരം സമിതി അദ്ധ്യക്ഷന്‍ തോമസ് ടി. കീപ്പുറം എന്നിവര്‍ അറിയിച്ചു.
മരങ്ങാട്ടുപിള്ളിയില്‍ 103 പദ്ധതികളാണ് പൂര്‍ത്തിയാക്കിയത്. 99.13746 രൂപ പ്ലാന്‍ വിഹിതവും മെയിന്റനന്‍സ് ഫണ്ടില്‍ 3843800 രൂപയും ചെലവഴിച്ചു. പ്രസിഡണ്ട് ബെല്‍ജി ഇമ്മാനുവല്‍ പറഞ്ഞു. തനതു ഫണ്ടും 98 ശതമാനവും ചെലവഴിച്ചു. മുട്ടക്കോഴി, ടര്‍ക്കി കോഴി വിതരണം, മത്സ്യഗ്രാമം പദ്ധതി എന്നിവ നടപ്പിലാക്കി. ഉറവിട മാലിന്യ നിര്‍മ്മാര്‍ജ്ജന പദ്ധതിക്കും തുടക്കം കുറിച്ചു.
ഉഴവൂര്‍ ബ്ലോക്ക് പഞ്ചായത്ത് 84 ശതമാനം തുക വിനയോഗിച്ചതായി പ്രസിഡണ്ട് എം.എം. തോമസ് അറിയിച്ചു. വെളിയന്നൂര്‍ ഗ്രാമ പഞ്ചായത്ത് 93 ശതമാനം തുക ചെലവഴിച്ചതായി പ്രസിഡണ്ട് എം.എന്‍. രാമകൃഷ്ണന്‍ നായര്‍ പറഞ്ഞു. ജനറല്‍ വിഭാഗത്തില്‍ 99.8 ശതമാനമാണ് വിനയോഗിച്ചത്.
ഉഴവൂര്‍ ഗ്രാമ പഞ്ചായത്ത് 87 ശതമാനം ചെലവഴിച്ചു. മുന്‍ വര്‍ഷങ്ങളെ അപേക്ഷിച്ച് മെച്ചപ്പെട്ട പ്രകടനമാണിതെന്ന് പ്രസിഡണ്ട് പി.എല്‍. അബ്രാഹം പറഞ്ഞു. ജനറല്‍ വിഭാഗത്തില്‍ 97 ശതമാനം വിനയോഗിക്കാനായി. കുറവിലങ്ങാട് ഗ്രാമ പഞ്ചായത്തില്‍ 90 ശതമാനമാണ് പദ്ധതി വിനയോഗമെന്ന് പ്രസിഡണ്ട് ടി.എസ്. രമാദേവി പറഞ്ഞു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ